Waterkloof se hoof skuldig, afgedank
2010-05-07 08:26
Pretoria - Dr. Christo Becker, hoof van die Hoërskool Waterkloof, is afgedank ná sy skuldigbevinding in ’n tugverhoor.
So ook Hester van der Merwe, finansiële beampte van die skool.
Charles Phahlane, woordvoerder van die onderwysdepartement, het gesê Van der Merwe is gister oor die uitslag van haar verhoor ingelig.
Sy is skuldig bevind aan ’n oortreding van haar diensvoorwaardes. Sy het vyf dae tyd om teen haar ontslag te appelleer.
Becker is skuldig bevind aan die oortreding van die tugkode en prosedures van indiensneming. Hy het reeds teen sy ontslag geappelleer.
Phahlane het gesê indien hul appèlle misluk, sal hulle wel die voordele (soos pensioengeld) kry waarop hulle geregtig is tot op die datum wat hulle uit diens gestel is.
André Eloff, adjunkhoof, se verhoor is gister afgesluit en die tugkomitee sal die uitslag later bekend maak.
Die skool se beheerliggaam het vroeër ’n forensiese oudit gedoen waarin prima facie-bewyse van ongerymdhede in die skool se geldsake geblyk het.
Phahlane het egter gesê geen klagte van korrupsie of bedrog is teen Becker en Van der Merwe aanhangig gemaak of ondersoek nie.
Die beheerliggaam het gister in ’n brief aan ouers gesê nóg die departement nóg Becker het die skool van ’n afskrif van die klagstaat of uitspraak voorsien.
“Die beheerliggaam kan dus geen kommentaar lewer op die aanklag of uitspraak nie. Die beheerliggaam bevestig egter sy toegewydheid aan behoorlike en deursigtige administrasie en rekenkundige, verantwoordbare finansiële praktyke by die Hoërskool Waterkloof.”
’n Ouer met wie Beeld gepraat het, het gesê die algemene gevoel by die skool is dat “hierdie hele ding nou net agter die rug moet kom”.
“Ons skool het in die proses baie seergekry en ook leerlinge verloor.”
Becker het nie gister op Beeld se selfoonboodskappe gereageer vir kommentaar nie.
- Beeld