Waterkloof-2 moet terug tronk toe, sê regskenners

2011-12-24 08:59

Philip de Bruyn

Kaapstad – Daar is oorgenoeg regsgronde waarop die departement van korrektiewe dienste (DKD) kan steun om te sorg dat die vrylating van twee lede van die Waterkloof-4 tersyde gestel word en hulle hul tronkstraf hervat.

Dit is trouens “onrusbarend” dat die DKD nie al van die eerste dag van die aansoek in die streekhof betrokke geraak het om die twee se vrylating te keer nie, sê dr. ­Leon Wessels, erehoogleraar aan die Potchefstroom-kampus van die Noordwes-Universiteit.

Prof. Marinus Wiechers, oud-hoogleraar in die reg aan Unisa, het gesê: “Toe ek vanoggend (gisteroggend) lees dat hulle in die tronk aan maatskaplike werkers gesê het hulle volstaan daarby dat hulle geen moord gepleeg het nie, het al my simpatie met hulle verdwyn. Ek het fisiek siek en geskok gevoel.

“Die DKD kan en moet die besluit van streeklanddros Peet Johnson in Pretoria op hersiening na die hooggeregshof vat.”

Johnson het Reinach Tiedt en Gert van Schalkwyk se vonnisse van 12 jaar ná net drie jaar in korrektiewe toesig omskep.

“Dit lyk my al die bekende, regsaanvaarde doelstellings met straf is in hulle geval oor die hoof gesien. Mense moenie perspektief verloor nie. Buiten die streeklanddros wat hulle gevonnis het, is die hele saak later deur 15 regters oorweeg–twee in die hooggeregshof, twee in die appèlhof en 11 in die konstitusionele hof.

“Al 15 dié regters het die streeklanddros se skuldigbevinding en vonnis regstreeks of onregstreeks (deur appèl te weier) bekragtig. Hul verhaal dat hulle iemand aangerand het, maar nie vermoor het nie is deur al dié regters verwerp.”

Hy het gesê ’n hersieningsaansoek kan veral op grond van die klaarblyklike ondermyning van die doeleindes met straf gebring word. “Die feit dat iemand ’n modelgevangene is, maak hom nog lank nie geregtig op so ’n onbehoorlik vinnige omskakeling van sy vonnis in korrektiewe toesig nie. Dit is suiwer ’n paroolgrond, wat oor drie jaar eers vir Tiedt en Van Schalkwyk ter sprake sou kom.”

Wessels het gesê buiten die feit dat die DKD nie moes sit en vingertjies draai het nie, klink dit “baie onrusbarend” dat ’n gevangenisstraf wat deur soveel senior regsoë bestudeer is (verwysende na die 15 regters) sommer so deur ’n paroolraad gewysig kan word.

- Die Burger