Waterfront kry plesierwiel voor WB
2010-04-21 07:52
Jodine Cloete
Kaapstad - ’n Skouspelagtige uitsig oor Robbeneiland, die Kaapstadse middestad en Tafelberg is wat wag op waagmoediges wat kans sien om ’n 50 m hoë plesierwiel in die V&A Waterfront aan te durf.
TheWheel of Excellence is soortgelyk aan die bekende London Eye en sal teen Mei van Parys, Frankryk, by die Waterfront aankom.
Dié wiel sal teen vroeg Junie operasioneel wees vir die publiek, gereed vir die toeloop van buitelandse toeriste gedurende die Wêreldbeker-sokkertoernooi.
Die wiel bestaan uit 36 luukse kapsules en 288 mense (agt in ’n kapsule) kan tydens ’n rit op die wiel geakkommodeer word. ’n Rit, teen R70 per persoon, duur tussen 15 minute en 20 minute.
Die kapsules het glasvloere en lugversorging.
“Besoekers sal met nuwe oë na die Waterfront kyk en terselfdertyd ’n wonderlike geleentheid geniet,” het John Elliott, woordvoerder van die V&A Waterfront, gesê.
Die wiel gaan by die Gateway Canal opgerig word. Dit sal minstens ses maande in die Waterfront wees.
Die wiel, wat deur Ronald Bussink ontwerp is, was al in lande soos Amerika, Australië, Frankryk en Japan.
Vir meer inligting besoek www.waterfront.co.za.
- Sport24