Water is Kaapstad se grootste skuldlas
2010-08-03 18:48
Kaapstad - Die Kaapstadse munisipaliteit sit met ’n waterrekening van R1,3 miljard wat hy op sy maag kan skryf en met die naaste emmer water kan afwas.
Luidens ’n opsomming van die agterstallige geld wat teen einde Junie aan die munisipaliteit verskuldig was, is die grootste enkele bedrag dié vir water, waarvan ’n groot deel weens waterlekkasies is.
Die totale agterstallige skuld is net minder as R3,5 miljard.
Boonop het die munisipale geldinvorderaars nie die laaste tyd so goed gevaar nie omdat hul aandag by die Wêreldbeker-sokkertoernooi was.
Trevor Blake, die stad se direkteur van inkomste, het sy kommer uitgespreek oor die hoeveelheid water wat weens lekkasies verlore gaan.
In die verslag oor waterbestuur wat gister aan die portefeuljekomitee vir nutsdienste voorgelê is, is waterverlies in die groter waterverspreidingsnetwerk 25,4% oor ’n tydperk van ’n jaar. Dit is altesaam 6998997 kiloliter water.
Een oplossing is die installering van meganismes om die waterdruk, en daarmee ook waterlekkasies, te beperk. ’n Ander oplossing is ’n program om water- bestuurtoestelle by eiendomme te installeer. Amptenare sukkel egter om hul teikens daarmee te haal.
Donnavin Wright van waterbestuur het gesê dit is maklik om in teorie die installering van dié toestelle te verduidelik, maar die groot probleem is om verbruikers se gewoontes te verander.
Blake het bygevoeg skuld van ander bronne, soos die provinsiale en nasionale regering, word op hoë vlak aangepak.
Die warm aartappel van R21miljoen wat tussen die nasionale en provinsiale regeringsvlakke rondgegooi is vir agterstallige munisipale heffings vir die Groote Schuur-hospitaal moet volgens ’n regsmening deur die nasionale regering betaal word.
Volgens Blake is rekeninge deur onderwysinstellings ’n groot probleem. Die begrotings wat aan skole toegedeel is, maak nie voorsiening vir die verhoogde elektrisiteitsrekeninge nie. Die provinsiale ministers van onderwys en finansies is juis besig om ’n antwoord hiervoor te vind.
Skole skuld die Kaapstadse munisipaliteit reeds meer as R51miljoen, wat deur die nasionale regering vereffen moet word.
Op provinsiale vlak skuld die onderwysdepartement R67miljoen.
Blake het gesê dié agterstallige skuld is die laaste in die pot wat nog ingevorder moet word, en juis die moeiliker probleme wat nog onopgelos is.
- Die Burger