Wapentransaksie: 'Zuma se regter' in ondersoekspan
2011-10-25 08:03
Kaapstad – Die regter wat pres. Jacob Zuma in 2006 op ’n verkragtingklag vrygespreek het, is deel van die geregtelike kommissie van ondersoek na die wapentransaksie.
Regter Willem van der Merwe, wat meer as 26 jaar ondervinding het, is tans adjunkregterpresident in Noord-Gauteng.
Die ander twee regters in die kommissie is regter Willie Seriti van die appèlhof en regter Francis Legodi, ook van die Noord-Gautengse hooggeregshof.
Seriti was onder meer op die bank toe die Waterkloof-4 se appèl teen hul skuldigbevinding en vonnis van 12 jaar tronkstraf in die Pretoriase hooggeregshof misluk het.
Zuma het Maandag gesê dié drie sal die ondersoek oor die volgende twee jaar afhandel.
Die president het egter steeds nie die verwysingsraamwerk vir die ondersoek bekend gemaak nie.
“Ek het die kommissie ingevolge die Grondwet aangestel.
“Die kommissie sal al die bewerings van onreëlmatighede met die wapentransaksie ondersoek.
“Regter Seriti sal die voorsitter van die kommissie wees,” was al wat hy gesê het.
Zuma het reeds op 15 September aangekondig dat hy besluit het om dié ondersoek na die wapentransaksie te heropen om die saak “finaal tot ’n einde te bring”.
Die wapentransaksie-kritikus Terry Crawford-Browne het gesê die president se aankondiging Maandag was ’n aanduiding dat Zuma “ernstig is oor die ondersoek”.
“Regter Seriti is ’n regter van die appèlhof, wat baie bemoedigend is. Regter Van der Merwe, sover my kennis strek, was voorheen ontevrede met die hantering van die aanvanklike wapentransaksie-ondersoek.
“Dus is sy keuse ook bemoedigend. Ons moet nou egter wag vir die verwysingsraamwerk voordat ons te opgewonde raak,” het Crawford-Browne gesê.
Patricia de Lille, burgemeester van Kaapstad, wat in 1999 die eerste ernstige vrae oor die transaksie geopper het, het Zuma se aanstellings van die kommissie ook verwelkom.
Sy het gesê al wat nou kortkom, is die verwysingsraamwerk.
“Dié raamwerk moet die kommissie bemagtig om enige individue wat betrek word by korrupsie, te kan vervolg.
“Die raamwerk moet ook toelaat dat die kommissie die redes vir Zuma se eie kwytskelding aan vervolging vir die wapentransaksie ten volle ondersoek.”
De Lille het gesê daar moenie ’n amnestie-klousule in die raamwerk ingewerk wees nie.
“Hierdie is nie ’n ondersoek na politieke oortredings nie, maar ’n korrupsiesaak.”
Volg Nuus24 op Twitter
- Volksblad