Wapenondersoek: Reëls gou bekend
2011-10-26 09:01
Kaapstad – Die verwysingsraamwerk wat die ondersoek na die omstrede wapentransaksie sal bepaal, kan binne die volgende twee dae bekend gemaak word.
Dié reëls sal die omvang van die magte bepaal van die drie regters wat in die kommissie sal dien en kan onder meer voorskryf of daar amnestievoorwaardes aan die ondersoek gekoppel sal word of nie.
Sonder amnestie kan die ondersoek ’n aantal senior ANC-lede en regeringsamptenare onder groot druk plaas.
Amptenare wat reeds verbind is met die wapentransaksie, sluit in oud-pres. Thabo Mbeki, Chippy Shaik, Fana Hlongwane en Tony Yengeni en selfs president Jacob Zuma.
Hlongwane is in Mei vanjaar in ’n Sweedse ondersoek uitgewys as die ontvanger van omkoopgeld wat deur ’n filiaal van die Sweedse wapenvervaardiger SAAB aan hom betaal is.
SAAB se uitvoerende hoof het later bevestig dat omkoopgeld van R24 miljoen aan Hlongwane betaal is in verband met die wapentransaksie.
Hlongwane was een van Joe Modise, oud-minister van verdediging, se topadviseurs.
Mac Maharaj, presidensiële woordvoerder, het gister aan Volksblad gesê die inhoud van die verwysingsraamwerk waarbinne die kommissie bedryf sal word, sal “almal tevrede stel”.
Maharaj sê Zuma sal die finale stel reëls persoonlik goedkeur voordat dit bekend gemaak word.
“Ons werk so vinnig moontlik om die regsaspekte en laaste besonderhede uit te stryk voordat die aankondiging gedoen sal word, maar dit kom gewis binne die volgende dag of twee.”
Zuma het Maandag die drie regters aangekondig wat in die kommissie van ondersoek sal dien.
Dié drie regters sal gelei word deur regter Willie Seriti van die appèlhof.
Zuma het die wapentransaksie-ondersoek op 15 Mei vanjaar heropen en gesê die departement van justisie sal die besonderhede uitwerk.
Maharaj sê Zuma se redes vir die ondersoek is om die saak tot ruste te bring.
“Die saak sleep nou al jare voort en die president het besluit die beste manier om dit te beëindig is deur ’n kommissie aan te stel.”
Een van die meer omstrede kwessies wat die kommissie moontlik sal moet ondersoek, is Zuma se eie betrokkenheid by die wapentransaksie.
Patricia de Lille, die eerste om, reeds in 1999, ernstige vrae oor die saak te opper, het reeds gesê die kommissie moet onder meer die redes vir Zuma se vroeëre kwytskelding ondersoek.
Een van die eerste dinge wat die kommissie sal moet doen, is om die bewysstukke van die saak wat deur die Valke gehou word, by hulle te kry. Dit sluit in 460 bokse vol dokumente en 4,7 miljoen elektroniese lêers wat ondersoek sal moet word.
Volg Nuus24 op Twitter
- Volksblad