'Wapen-kommissie het tweede agenda'

2013-01-17 10:19

Johannesburg – Die integriteit van die kommissie wat die wapenskandaal ondersoek, is onder ernstige verdenking nadat ‘n bedankingsbrief van een van sy ondersoekers uitgelek het, het ‘n koerant berig.

Beeld berig Norman Moabi, ‘n prokureur en voormalige waarnemende regter van Pretoria, beweer in sy brief – wat aan dié dagblad gelek is – dat die kommissie nie deursigtig is nie, en ‘n alternatief of “tweede agenda” verskuil.

Moabi sê in die brief, wat aan regter Willie Seriti geadresseer is, dat hy uittree as gevolg van inmenging en omdat hy vertroue in die kommissie se werk verloor het.

“Ek het na die kommissie gekom om met integriteit, waardigheid en waarheidliewendheid te dien. Ek kan nie met ’n skoon gewete voorgee dat ek blind is vir wat by die kommissie aan die gang is nie.”

Volgens Moabi bestuur Seriti die kommissie met ’n ysterhand, en word inligting gemanipuleer en van sommige kommissielede weerhou.

Bydraes van individue wat nie die “tweede agenda” najaag nie, word na bewering geïgnoreer.

Beeld het Moabi gekontak, maar hy wou nie kommentaar lewer nie.

William Baloyi, woordvoerder van die kommissie, het gesê die kommissie het net een agenda en dit is om die saak te ondersoek soos bepaal deur pres. Jacob Zuma.

“Enige ander agenda waarna mnr. Moabi verwys, is ’n misleiding.”

Sittings sal na verwagting in Maart begin.

Zuma het in Oktober 2011 aangekondig dat Seriti die voorsitter van die kommissie van ondersoek sal wees. Regters Hendrick Musi en Francis Legodi vorm ook deel van die kommissie.

Regter Willem van der Merwe – dieselfde regter wat die president op ‘n aanklag van verkragting vrygespreek het – is aanvanklik aangestel om Seriti en Legodi by te staan.

Die presidensie het in Desember 2011 aangekondig dat Van der Merwe aangedui het dat hy weens persoonlike redes nie op die kommissie sal dien nie. Zuma het toe vir Musi aangestel.

Die ooreenkoms – wat destyds beraam is om R43 miljoen te beloop – teister Suid-Afrika se politiek sedert dit in 1999 onderteken is, nadat die destydse PAC-LP Patricia de Lille die parlement van korrupsie beskuldig het.

Zuma is self van korrupsie aangekla nadat sy finansiële raadgewer, Schabir Shaik, daaraan skuldig bevind is dat hy omkoopgeld vir die president van ‘n Franse wapen-maatskappy gefasiliteer het.

Die aanklagte teen die president is later laat vaar.

Volg Nuus24 op Twitter

- SAPA