Wagte skiet inbreker dood
2010-01-18 08:40
Virginia Keppler
Johannesburg - Veiligheidswagte het Sondagoggend ’n gewapende inbreker doodgeskiet en sy makker gearresteer kort nadat hulle by ’n huis in Brummeria, Pretoria, ingebreek het.
’n Derde inbreker het gevlug.
Die inbrekers, glo van Mamelodi, is gesoek vir onder meer huisbraak en die besit van vermoedelik gesteelde eiendom.
Aveline Hardaker, polisiewoordvoerder, het gesê die drie boewe het omstreeks 10:30 by ’n huis in Hendriklaan ingebreek toe die huis se alarm geaktiveer is.
Hardaker het gesê twee veiligheidswagte van die maatskappy ADT was gou op die toneel en het op die inbrekers by die huis afgekom.
Die inbrekers het in ’n wit Golf gespring en op die wagte begin skiet. Die wagte het op die motor losgebrand en die bestuurder van die voertuig doodgeskiet.
“Hy het beheer oor die voertuig verloor en in die muur van die Brummeria-landgoed op die hoek van Hendriklaan en Snymanweg vasgery.
“Die ander verdagte is onmiddellik gearresteer, maar die derde verdagte het gevlug.”
Volgens Hardaker het die polisie kort daarna op die toneel opgedaag. Elektriese goedere en ’n kamera is in die voertuig gevind.
Hardaker het gesê nie een van die wagte is beseer nie. Die verdagte sal binnekort in die hof verskyn.
Hardaker het gesê die polisie ondersoek ’n klag van huisbraak en die besit van vermoedelik gesteelde eiendom.
- Beeld