Wag op uitslae laat leerlinge depressief raak
2011-12-31 10:04
Johannesburg – Kort voordat die matriekuitslae aangekondig word, word beradingsdienste oorval met oproepe van depressiewe matrieks en bekommerde ouers, en dit lyk of dié oproepe toeneem, sê beraders.
Meer as 10% van alle oproepe wat die Suid-Afrikaanse depressie-en-angsgroep (Sadag) ontvang, is van matrieks wat depressief is voor en ná hul uitslae verskyn, het me. Janine Shamos, woordvoerder, gesê.
“Matrieks bel Sadag omdat hulle nie na verwagting presteer nie. Ons kry oproepe van leerlinge wat bang is hulle gaan matriek druip en ook leerlinge wat ’n rits onderskeidings verwag. Dit lyk asof dit meer is as vorige jare.”
Sowat 22% van die 2 500 matrieks van 2010 wat vroeër vanjaar die kletsnetwerk MXit se beradingsportaal besoek het, het selfmoord oorweeg nadat hul matriekuitslae bekend gemaak is.
Volgens Chantelle Bezuidenhout, wat vanjaar in matriek in die Hoërskool Dinamika in Brackenhurst, Alberton, was en in die verteenwoordigende leerlingraad (VLR) gedien het, maak leerlinge en veral matrieks gebruik van die opgeleide beraders by die skool.
“Die VLR het maandelikse verslae gekry en meer as 40 matrieks, almal elke maand nuwe gevalle, het van die beraders gebruik gemaak. Ek self het aan die begin van die jaar kalmeerpilletjies gebruik om met die skielike druk en baie werk te help.”
Universiteitskeuring, werkgeleenthede en druk van ouers is die grootste oorsaak van dié angs en depressie, het Gautengse leerlinge gesê.
Rikus Dorfling, ’n matriekleerling aan die Hoërskool Florida in Roodepoort, het gesê sy Kersfees en Nuwejaar is effens bederf omdat hy angstig op die bekendmaking van sy matriekuitslae wag.
“Daar was vanjaar ’n meisie, nogal ’n bright spark en glad nie dom nie, wat in die klas voor almal ’n uitbarsting gehad het. Sy kon net nie meer al die werk en die druk hanteer nie. Die druk van ’n mens se ouers is nogal erg. Jou matriekuitslae is rêrig ’n groot ding. Dit bepaal wat jy met jou lewe sal doen of nié sal doen nie.”
Mnr. Charles Phahlane, Gautengse onderwyswoordvoerder, en Shamos het albei gesê matriekleerlinge moet nie bekommerd wees wanneer hul name nie in die koerante verskyn of dit blyk hulle het swakker gepresteer as verwag nie. “Gaan eerder na die skool toe, praat met die onderwysers en maak seker dat jou punte korrek aan jou gegee word.”
Ken ook jou opsies, is Shamos se raad. “In sommige gevalle is dit moontlik om die vak oor te skryf. Niks is ooit so sleg as wat dit in daardie stadium lyk nie.”
* Bekommerde ouers, matrieks en leerlinge kan Sadag om hulp skakel by 0 011 262 6396.
– Volg Nuus24 op Twitter
- Beeld