Wag beseer in Casino-rooftog
2009-09-18 16:28
Johannesburg - 'n Grootskaalse polisiesoektog is gelas na nege mans wat die Emerald Casino in Vanderbijlpark beroof en 'n sekerheidswag met 'n vuurwapen op sy kop geslaan het.
Drie gewapende mans het omstreeks 11:15 die twee sekerheidwagte, wat koffers met geld gedra het, genader. Een van die rowers het die een wag met 'n vuurwapen oor sy kop geslaan en die koffer gegryp.
Die trio het in 'n Toyota Hilux-bakkie, waarin ses ander mans gewag het, gevlug.
Insp. Kinnie Steyn, 'n polisiewoordvoerder, het gesê die sekerheidswag het 'n wond aan sy kop opgedoen en is na 'n plaaslike hospitaal geneem.
– Sapa