Seun uit hospitaal ná ouers sterf
2010-05-24 10:35
Lambert Snyders (5) van Bela-Bela (Warmbad) wat wees gelaat is ná ’n motorongeluk sowat ’n maand gelede, is uit die Netcare Akasia-hospitaal in Pretoria ontslaan.
Henk Botha, Lambert se oom, het gesê die operasie aan sy kaak, gesig en regteroog was ’n groot sukses.
“Dit gaan fisiek baie goed met Lammie. Dit lyk nie of hy nog operasies nodig gaan hê nie,” het Botha gesê.
Die seun se ouers, Louw Snyders (56) en sy vrou, Jacomine (29), is in die ongeluk op die ou Pretoria-pad buite Bela-Bela dood.
Susan Botha, Lambert se enigste ouma, is ook in die ongeluk dood.
’n Groot vragmotor het reg van voor teen die gesin se motor gebots.
Lambert, wat op sy ma se skoot in die passasiersitplek gesit het, is teen die paneelbord vasgedruk.
M.J. Botha (9), ’n nefie van Lambert, is ook in die ongeluk beseer.
Hy is in die Polokwane- provinsiale hospitaal behandel en ’n paar dae later ontslaan.
Die Snyders-egpaar het nie ’n mediese fonds gehad nie en Lambert se beserings was te ernstig vir behandeling in die Warmbad- provinsiale hospitaal, maar lede van die publiek het hul hart oopgemaak toe hulle in Beeld van Lambert gelees het.
Verskeie dokters in Pretoria het hul dienste gratis aangebied en die Tromar-ambulansdienste het Lambert gratis na Pretoria vervoer.
Die Netcare Akasia-hospitaal het sy verblyf gratis verskaf.
Nog weldoeners het selfs geskenke en geld gegee.
Botha het gesê Lambert kuier by familie-vriende in die Vrystaat. Hy huil nog baie oor sy ouers wat dood is.
Hy kon nie hul begrafnis bywoon nie omdat hy toe nog baie ernstig siek was in die hospitaal.
Botha het gesê dit is nog nie duidelik wat Lambert se toekoms inhou nie.
Die familie weet nog nie by wie hy voortaan sal woon nie.