Waaghals val 60 m van Tafelberg, breek bene
2012-01-17 09:22
Kaapstad – Die Amerikaanse waaghals Jeb Corliss (35) het gisteroggend wonderbaarlik oorleef nadat sy sprong van ’n rotslys teen Tafelberg skeefgeloop het.
Corliss het teen die berg gebots voordat die noodvalskerm van sy sweefpak oopgegaan het. Hy het veelvuldige beenbreuke opgedoen.
Die ongeluk het omstreeks 09:45 gebeur.
Me. Merle Collins, woordvoerder van die Tafelberg Nasionale Park, het gesê Corliss het sowat 60 m ver geval voordat sy noodvalskerm oopgegaan het.
Hy het sowat 800m onder die sweefspoorstasie tot stilstand gekom.
Dit was die tweede keer in minder as ’n week dat Corliss, een van die wêreld se beste Base- (Building, Antenna, Span, Earth) en sweefspringers, van Tafelberg gespring het.
Die Burger het Vrydag oor sy eerste sprong berig.
Hy het verlede Woensdag ook in ’n sweefpak van Tafelberg gespring.
In Kaap vir opnames
Corliss, ’n veteraan van meer as 1 000 spronge van bakens soos die Eiffeltoring, die Petronas-torings in Maleisië en die Golden Gate-brug in San Francisco, is in Kaapstad vir opnames deur die Amerikaanse TV-netwerk HBO.
’n Vriend, mnr. Joby O’Gwyn (37) van Los Angeles, is ook per helikopter van die berg gebring. Hy het kort voor Corliss gespring en was ongedeerd.
“Jeb en sy kameraman, Geoff, het gevlieg en toe hoor ek ’n geluid.
“Dit het geklink of Jeb ’n rotslys tref en toe het sy valskerm oopgegaan.
“Daarna het hy die rotswand onder die lys getref.
“Hy het dus twee keer baie hard teen die berg gebots,” het O’Gwyn vertel.
Volgens O’Gwyn was Corliss steeds by sy volle bewussyn en het hy gepraat.
Volgens mnr. Anwaaz Bent, ’n woordvoerder van Wildernis- soek-en-redding, het Corliss gister van ’n rotslys naby die boonste sweefspoorstasie gespring.
Mnr. Kevin Tromp, nog ’n woordvoerder wat deel was van die reddingspan, het gesê Corliss het op die kontoerpad, sowat 800m onder die sweefspoorstasie, tot stilstand gekom.
Volgens me. Keri Davids, woordvoerder van die provinsiale departement van gesondheid se nooddienste, is ’n AMS-reddingshelikopter ontbied.
“Twee paramedici is tot by die pasiënt laat sak.
“Hy is in ’n spesiale draagbaar vasgegespe en per helikopter na die Tafelbergpad-parkering vervoer.”
Geen permit
Hy is daarvandaan met ’n ambulans na die Christiaan Barnard-hospitaal gebring.
Volgens me. Michelle Norris, woordvoerder van die hospitaal, is die tibia en fibula van albei sy bene op verskeie plekke gebreek, maar is sy toestand stabiel.
Corliss het aan Norris gesê hy voel beter as ooit.
Volgens Collins reik die Tafelberg Nasionale Park geen Base-springpermitte uit nie en dié aktiwiteit word verbied.
“Ons oorweeg dit om ’n klag vir die gebruik van sweeftoerusting sonder ’n permit teen Corliss in te dien, of om hom te beboet,” het Collins gesê.
Me. Colette van Aswegen, woordvoerder van die Tafelberg-sweefspoor, het ook bevestig dat hulle nie permitte aan Base-springers uitreik nie.
Hoewel hulle rolprentpermitte uitreik, het Corliss nie om so ’n permit aansoek gedoen nie.
– Kyk die video hier
– Volg Nuus24 op Twitter
- Die Burger