WB-toeris in hof ná ongeluk
2010-06-22 06:25
Pieter Steyn en Earl Coetzee, Beeld
Johannesburg - Een mens is dood en nog een beseer in ’n motorongeluk toe ’n Britse toeris glo in opdrag van sy GPS ’n U-draai gemaak en teen ’n aankomende voertuig gebots het.
James Hayward (24) van Engeland, het Sondag op die N1, suid van Bloemfontein, die afdraai na die Rosestad gemis.
Nadat hy glo sy GPS se instruksie om ’n U-draai te maak gevolg het, het hy teen ’n ander voertuig gebots.
Die bestuurder van die motor het aan sy beserings beswyk en die passasier is beseer.
Hayward het Sondagaand in ’n spesiale Fifa-hof verskyn op aanklag van strafbare manslag.
Hayward en twee vriende, wat in Suid-Afrika is vir Wêreldbeker-sokkertoernooi, sou Maandag na Durban vertrek het. Sy terugvlug na Brittanje is vir 4 Julie geskeduleer.
Hy is Sondagaand op borgtog van R1 000 vrygelaat. Hayward het Maandag weer in die hof verskyn en sy borgtog is verleng.
Die saak is uitgestel tot Donderdag terwyl die hof wag vir die uitslae van die oorledene se nadoodse ondersoek.
Die polisie wag ook nog op inligting van die beseerde passasier.
- Beeld