Vyftien brand dood in kinderhuis
2010-02-09 12:50
Durban – Vyftien mense, insluitende minstens agt kinders, het Dinsdag doodgebrand in ‘n kinderhuis buite Newcastle, het KwaZulu-Natal se departement van sosiale ontwikkeling gesê.
Verder is nog nege kinders gehospitaliseer.
“Die getal mense wat doodgebrand het, het na 15 gestyg,” het Mandla Ngema, woordvoerder vir Meshack Radebe, die LUR vir sosiale ontwikkeling gesê.
“Die persoon wat in beheer is van die huis, sowel as haar vier kinders, het doodgebrand. Agt ander kinders se lyke is ook gevind.”
Volgens Ngema het ‘n reddingspan later die oggend nog twee lyke gevind.
Dit is nog nie duidelik hoeveel van dié wat gesterf het kinders was nie.
Supt. Jay Naicker het gesê dat die polisie Dinsdagoggend omstreeks 06:00 uitgeroep is na die Hope in Christ Home.
“Die LUR gaan vandag na die toneel om die situasie te ondersoek,” het Ngema gesê.
Daar word beraam dat die kinders wat doodgebrand het tussen die ouderdomme van twee en 15 jaar was.
Twee voertuie buite die huis het ook gebrand.
‘n Band-ondersoekspan was ook onderweg van Pretoria om die oorsaak van die brand te ondersoek.
Die Hope in Christ Home was ‘n kinderhuis wat deur die departement van sosiale ontwikkeling bestuur is.
- Sapa