Vyfjarige seun sien hoe pa sy ma vermoor

2013-01-02 11:38

Johannesburg – ‘n Vyfjarige seun het gesien hoe sy pa enkele minute voor die nuwe jaar sy ma aangerand en geskiet het, het die polisie gesê.

“Die seun se ma, wat 26 jaar oud was, en die pa het met mekaar gepraat toe hy haar begin slaan het. Daarna het hy haar voor die seun geskiet,” het kol. Leonard Hlathi gesê.

Dis onbekend waaroor die paartjie Maandagaand in hul huis in Senotlelo, buite Mhlanga, in Mpumalanga baklei het.

Die seun het na sy ma se ouers gehardloop nadat sy geskiet is.

“Die familie van die vrou het na die huis gegaan en voordat hulle by die toneel opgedaag het, het hulle geweerskote gehoor... Hulle het toe gesien dat die man selfmoord gepleeg het.”

Die vrou is na die Mmametlhake-hospitaal geneem, waar sy ure later gesterf het.

Volg Nuus24 op Twitter

- SAPA