Vyfde verdagte in hof vir moord op Cope-LP
2012-02-03 18:33
Johannesburg – ‘n Vyfde man wat in hegtenis geneem is in verband met die moord op die Cope-LP Jack Tolo sal na verwagting Vrydag in die Sekhukhune-landdroshof verskyn, het die polisie in Limpopo gesê.
Die 41-jarige, wat daarvan beskuldig word dat hy die meesterbrein agter die moord in Augustus 2011 was, is Donderdag in Mamelodi in Pretoria in hegtenis geneem, het lt. kol. Mohale Ramatseba gesê.
Vier ander mans het reeds in verband met die moord in die hof verskyn.
Peter Ditshego (30), Frans Matula (33), Solomon Nkosi (41) en Fafi Mokgaumane Leshilo (41) staan tereg op aanklagte van moord, vier aanklagte van ontvoering, roof met verswarende omstandighede en saakbeskadiging.
Die vier, wat in polisie-aanhouding is, sal op 5 Maart weer in die Sekhukhune-landdroshof verskyn.
Tolo is op 21 Augustus by sy huis in Ga-Mashu, Sekhukhune, vermoor. Tydens die aanval het ses mans Tolo se familie vasgebind, vir Tolo doodgeskiet en aangedring op geld, juweliersware en selfone.
Tolo se selfoon is glo later by een van die mans wat in polisie-aanhouding is gevind.
Volgens Ramatseba is die sesde verdagte, Phankgo Lucas Makua Choma, van Tokakgoma in Sekhukhune, steeds op vrye voet.
Enigiemand met inligting kan lt. Morris Machethe van die Valke op 082 451 7158 kontak.
– Volg Nuus24 op Twitter
- SAPA