Vyfde man vas vir moord op boer
2012-01-06 08:33
Bloemfontein – 'n Vyfde man het Donderdag weens die koelbloedige moord op Thomas Ferreira (54), ’n Vrystaatse boer en sakeman, in die Bloemfonteinse landdroshof verskyn.
Dit kom nadat vier mans vroeër vasgetrek is.
Gilford Mahlakametsa (38) is Woensdag omstreeks 04:00 by sy huis in Batho in hegtenis geneem.
Hy en die ander vier mans sal weer op 12 Januarie in die hof verskyn en sal dan moontlik om borgtog aansoek doen.
Kapt. Rulene Kühn, polisiewoordvoerder, het vroeër gesê die polisie se direktoraat vir die ondersoek van voorkeurmisdade (Valke) het vir Mahlakametsa ná ’n deeglike ondersoek in hegtenis geneem en ook op ’n pistool – vermoedelik die moordwapen – beslag gelê. Dié pistool is vermoedelik ’n gesteelde wapen.
Ferreira is die aand van Sondag 27 November herhaaldelik deur sy kombuisdeur op die plaas Riversford geskiet.
Die vermoorde Ferreira se suster, Michelle Ferreira, sê sy glo nie dat roof die motief vir die koelbloedige moord op haar broer was nie.
“Ek dink hier sit veel meer agter die storie. As hulle kom roof het, hoekom het hulle niks gevat nie? Die sleutels van sy Jeep en Nissan Navara wat in die motorhuis was, het openlik in die huis gehang.”
Sy sê as hulle regtig geld wou steel, kon hulle haar broer by sy vulstasie oorval het. Ferreira was die eienaar van die Shell-vulstasie by Tom’s Place, minder as 5 km van die plaashuis af.
Die vermoorde Ferreira het waarskynlik van sy moordenaars geken.
Volg Nuus24 op Twitter
- Volksblad