Vyf vas wat bakkie wou smokkel
2009-12-17 11:00
Johannesburg – Vyf mense is in hegtenis geneem nadat hulle ’n gekaapte bakkie glo oor die Masedonië-grenspos tot in Mosambiek wou smokkel, het die plaaslike polisie in Mpumalanga gesê.
Polisiebeamptes het die mans vroeg Woensdagoggend gewaar toe hulle besig was om die Isuzu bakkie deur ’n onwettige roete oor die grens naby Komatiepoort te smokkel, het kapt. Leonard Hlathi gesê.
"Die polisie het hulle voorgekeer vir ondervraging, maar drie verdagtes het uit die bakkie gespring en gevlug, terwyl die drie ander in hegtenis geneem is,” het hy gesê.
"Die polisie het kort daarna inligting oor die ander verdagtes ontvang. Twee van die drie verdagtes is later by ’n paneelklopper se winkel in hegtenis geneem.”
Volgens die verdagtes, het hulle die bakkie, wat in die Inkomazi-munisipaliteit gekaap is, tot in Mosambiek probeer smokkel.
Die polisie is tans besig om na die sedse verdagte, wat na bewering gewapen is, te soek.
Die mans sal na verwagting Donderdag in die landroshof in Komatiepoort verskyn.
Dit is die vierde poging waartydens misdadigers gekaapte motors oor die grens probeer smokkel.
-Sapa