Vyf vas vir moord op ANC-hoë

2011-01-07 12:00

Johannesburg - Vyf mans is vroeg Vrydagoggend in hegtenis geneem in verband met die moord op die hoofsweep van die Ehlanzeni-distriksmunisipaliteit, Johan Holme Ndlovu, het die polisie in Mpumalanga gesê.

“Die mans is in drie verskillende huise in Nyongane naby Hazyview in hegtenis geneem,” het kapt. Leonard Hlathi gesê.

“Twee selfone wat na bewering aan die vermoorde man behoort het, asook ‘n vuurwapen, is in hulle besit gevind. Die vuurwapen is die wapen wat na bewering gebruik is om Ndlovu te vermoor,” het hy gesê.

Ndlovu is Woensdag in die vroeë oggendure enkele kilometers van sy huis af in sy bors, hand en boud geskiet.

Sy liggaam is deur familielede in die bosse gevind nadat ‘n ongeïdentifiseerde man sy vrou gebel en gesê het waar om hom te vind.

Die mans sal na verwagting Maandag in die hof verskyn.

- Volg Nuus24 op Twitter
 

- SAPA