Vyf sterf, drie beseer in onwettige jaagtog

2013-01-02 13:48

Johannesburg – Vyf mense is dood en drie ander het ernstige beserings opgedoen toe twee bestuurders aan die Wes-Rand aan 'n onwettige wedren deelgeneem het, het Sowetan berig.

‘n Bejaarde voetganger en vier jong mense in ‘n bakkie het gesterf toe die bestuurder van die bakkie in Sebenzisa-straat beheer oor die voertuig verloor het.

Die bestuurder het na bewering teen ‘n motoris resies gejaag.

Die bakkie het Nko Motshwane (78) omgery terwyl die man saam met sy dogter na ‘n plaaslike begraafplaas gestap het.

Volgens die berig het die tweede bestuurder op die vlug geslaan.

“Ons kinders luister nie en hierdie is die gevolge,” het Jaftha Motsumi, 'n oom van een van die jong oorledenes, Thapelo Seloro, gesê.

“’n Mens sou dink dat hulle ná die Jub Jub (Molemo Maarohanye)-saak geleer het, maar duidelik het hulle nie,” het hy aan die koerant gesê.

Die polisie ondersoek ‘n saak van strafbare manslag.

Volg Nuus24 op Twitter

- SAPA