Vyf ministers swyg oor hotelkostes
2011-11-01 07:02
Kaapstad – Ministers moet ophou om “kommer oor veiligheid” as verskoning voor te hou wanneer hulle verblyfkoste in luukse hotelle bekend moet maak.
Dr. Ena van Schalkwyk, DA-woordvoerder oor die staatsdiens en administrasie, het gister dié tipe optrede as bedrieglik bestempel.
Volgens haar lyk dit eerder asof die regering iets het om weg te steek.
Van Schalkwyk het gesê van die 11 parlementêre antwoorde wat die DA van ministers oor hotelkoste ontvang het, weier vyf om besonderhede weens “kommer oor veligheid” bekend te maak.
Dié vyf ministers is Lindiwe Sisulu (verdediging), Dipuo Peters (energiesake), Jeff Radebe (justisie), Mildred Oliphant (arbeid) en Richard Baloyi, voormalige minister vir die staatsdiens en administrasie. Baloyi is in verlede week se kabinetskommeling aangewys as die nuwe minister van samewerkende regering en tradisionele sake.
Van Schalkwyk het gesê in sommige gevalle het lede van die uitvoerende gesag, soos Tina Joemat-Pettersson, minister van landbou, bosbou en visserye, bekend gemaak dat sy tussen 2009 en 2011 bykans R1,6 miljoen aan hotelverblyf bestee het. Haar kantoor het egter later gesê sy oorweeg tugstappe teen senior amptenare omdat hulle haar, die parlement en die nasie mislei het deur verkeerde inligting aan die parlement te verskaf.
“Daar is geen manier dat die bekendmaking van die koste van of uitgawes aan luukse verblyf die veiligheid van ministers kan kompromitteer nie. Ons wil nie weet waar die ministers môre gaan bly nie, maar wat hulle in die verlede aan hotelverblyf bestee het.”
Van Schalkwyk het gesê die toenemende tendens van ministers om agter veiligheidsfasades te skuil, moet gestop word.
“Ministers wat weier om parlementêre vrae te beantwoord, skend hul plig om deursigtigheid en verantwoordbaarheid te verseker.”
Sy gaan aan Max Sisulu, speaker van die parlement, skryf en hom versoek om ministers te verplig om vrae oor hul hoteluitgawes te beantwoord, het Van Schalkwyk bygevoeg.
– Volg Nuus24 op Twitter
- Die Burger