Vyf in hof oor 13 jaar oue moordsaak

2012-05-25 23:00

Johannesburg – Vyf mans het Vrydag in die Johannesburgse landdroshof verskyn in verband met die moord op Betty Ketani 13 jaar gelede, het die Gautengse polisie gesê.

“Die saak is tot 1 Junie vir borgtogaansoek uitgestel,” het lt.kol. Tshisikhawe Ndou, ‘n polisiewoordvoerder, gesê.

‘n Brief wat twee maande gelede tydens opknappingswerk aan ‘n huis in Johannesburg gevind is, het tot ‘n deurbraak in die saak en die vyf inhegtenisnemings gelei, het Ndou gesê.

Hy sê die brief gee die besonderhede van die misdaad “stap vir stap.”

Hy het bygevoeg die polisie is nog besig met hul ondersoek en kan moontlik nog verdagtes aankeer.

Die brief is glo ‘n skulderkenning deur een van die mense wat Ketani in 1999 vermoor het.

Ketani is op ‘n plaas in Johannesburg in die kop geskiet en daarna in 'n hospitaal opgeneem. Daarna is die 37-jarige ma later uit die hospitaal ontvoer en sedertdien as vermis beskou.

Dit is nie bekend of die outeur lewend of onder die aangehoudenes is nie.

Volg Nuus24 op Twitter

- SAPA