Vyf dood in Johannesburg-ongelukke
2011-12-11 13:00
Johannesburg – Vyf mense is dood en 15 ander beseer in twee afsonderlike ongelukke op die N1 in Johannesburg, het
paramedici Sondag gesê.
'n Bakkie en 'n motor het Saterdagaand op die N1 gebots, het Jeff Wicks, woordvoerder van Netcare, gesê.
Die bestuurder van die bakkie wou 'n U-draai maak toe die motor die voertuig tref. Die bestuurder van die bakkie en twee insittendes van die motor is op die toneel dood.
In nóg 'n ongeluk naby die Grasmere-tolhek is twee mense dood nadat 'n taxi waarin hulle gery het omgeslaan het.
"Die bestuurder het waarskynlik beheer oor die voertuig verloor nadat 'n agterste band gebars het," het Wicks gesê.
Die taxi het verskeie kere gerol voor dit tot stilstand gekom het en die twee mans is uit die voertuig geslinger. Albei is op die toneel dood.
Die vyftien beseerde insittendes is na verskeie hospitale in die gebied geneem.
– Volg Nuus24 op Twitter
- SAPA