Vyf dood, 17 gewond in aanval in KZN

2012-08-05 14:48

Johannesburg – Vyf mense is doodgeskiet en 17 is beseer by Ngudwini naby Sundumbili in die noorde van KwaZulu-Natal, het die polisie Sondag gesê.

‘n Groep gewapende aanvallers het glo mense aangeval wat Saterdagmiddag ‘n tradisionele funksie by die Khuzwayo-opstal bygewoon het, het kol. Jay Naicker gesê.

“Die verdagtes het op die groep losgebrand en het vyf mans doodgeskiet en 17 ander mense beseer. Dit is in hierdie stadium onduidelik watter tipe vuurwapens gebruik is.”

Hy sê die motief vir die skietery is onbekend en dit word nie verbind met politieke geweld nie.

Hy sê polisieversterkings is in die omgewing ontplooi om die situasie te monitor en om te verseker daar is geen verdere aanvalle nie.

“Speurders het die toneel Sondagoggend ondersoek om vas te stel wat gebeur het.”

Hy sê die provinsiale kommissaris, lt.genl. Mmamonnye Ngobeni, het beveel dat ‘n spesiale taakspan gevorm word om die aanval te ondersoek.

– Volg Nuus24 op Twitter

 

- SAPA