Vullisprobleme in Pretoria gou opgelos
2010-01-10 14:57
Johannesburg - Opgehoopte vullis in Pretoria sal binne 24 uur verwyder word, het die waarnemende stadsbestuurder Sondag gesê.
Die ophoping is veroorsaak deur "sporadiese stakings" deur werkers in die munisipaliteit se departement van landbou en omgewingsbestuur, het Oupa Nkoane in 'n verklaring gesê.
"Dit het in sommige gevalle veroorsaak dat vullis nie soos gewoonlik verwyder word nie. Dit het met reg gelei tot angs by sommige inwoners."
Die stad het begin om gebeurlikheidsmaatreëls in werking te stel om die ophoping teen Maandag uit die weg te ruim. Volgens Nkoane is 70 persent van die vullis reeds verwyder.
"Die laaste 30 persent sal in die volgende 24 uur verwyder word. Werkers is ten tye van die vrystel van hierdie verklaring reeds besig om die werk te doen," het hy gesê.
- Sapa