Vrystaatse wag kritiek ná transitorooftog
2010-11-21 15:44
Johannesburg - 'n 30-jarige veiligheidswag is in 'n kritieke toestand nadat
drie mans hom in 'n transitorooftog geskiet en met R400 000 gevlug het.
Die wag het Saterdagoggend geld opgelaai by Thaba Wholesale
in Botshabelo in die Vrystaat, toe drie mans hom met ‘n geweer oor die kop
geslaan het. Die mans het die wag toe in die skouer geskiet, het konstabel
Nomene Nokoale, woordvoerder van die Vrystaatse polisie gesê.
Die mans het 'n geldkluis met R220 680 kontant daarin, sowel
as 'n tjek vir R 178 728 geneem en in 'n Nissan bakkie gevlug. Die leë motor is
later in 'n nabygeleë gebied gevind.
Die wag is vir behandeling na die Botshabelo hospitaal geneem.
Daar is nog niemand in hegtenis geneem nie.
- SAPA