Vrystaatse ouma wreed verkrag
2010-11-11 08:17
Volksblad
Sasolburg - Midde-in skok en ongeloof oor die wrede verkragtings van ’n Bloemfonteinse dokter én ’n gr.8-meisie by ’n Johannesburgse skool, is ’n 92-jarige vrou van Sasolburg in nóg ’n uiters skokkende voorval in haar huis verkrag.
Dié vrou is glo deur haar kleinseun se vriend (23) verkrag, het Fikiswa Matoti, woordvoerder van die polisie op Sasolburg, Woensdag aan Volksblad bevestig.
Die slagoffer en haar kleinseun woon saam.
Matoti sê ouma en kleinseun het ’n reëling dat hy die veiligheidsdeur sluit wanneer hy die huis verlaat, maar dat hy die voordeur net op knip laat. Dan hoef hy haar nie wakker te klop met sy tuiskoms nie.
Volgens Matoti was die kleinseun en sy vriend verlede Vrydag by ’n partytjie elders in die woongebied Zamdela.
“In ’n stadium het hul sigarette opgeraak en die vriend het aangebied om sigarette by ’n nabygeleë winkel te gaan koop.
“Teen 01:00 het die vriend nog nie teruggekeer nie.
“Die kleinseun het besluit om huis toe te gaan.
“Hy het vermoed sy vriend het besluit om eerder maar te gaan slaap,” sê Matoti.
Met die kleinseun se tuiskoms was die voordeur gesluit.
Hy het geklop en sy ouma se hulpkrete uit die huis gehoor.
“Sy het geskree daar is iemand in die huis.”
Matoti sê die kleinseun het ’n weerkaatsing in die badkamer gesien en gehoor hoe ’n venster oopgaan.
Hy het sy vriend buite die badkamervenster betrap.
“Die vriend het weggehardloop en die kleinseun het hom agternagesit, maar kon hom nie vang nie.”
Die kleinseun het die veiligheidsdeur oopgebreek en sy ouma in ’n “verskriklike toestand” in haar slaapkamer aangetref.
’n Doktersondersoek het bevestig sy is verkrag.
Dit is nie duidelik hoe die verkragter in die huis ingekom het nie.
Die vriend is Dinsdag, ná ’n lang soektog, in hegtenis geneem.
Hy sal vanoggend in die landdroshof op Sasolburg verskyn.
Die bejaarde vrou en haar kleinseun se name word weerhou omdat sy as slagoffer van ’n seksuele misdaad nie geïdentifiseer mag word nie.
- Volksblad