Vroueliga soek Shrien in SA

2012-12-05 10:46

Johannesburg – Lede van die ANC se vroueliga beplan om volgende week na die Britse ambassade in Pretoria op te ruk, om te eis dat Shrien Dewani na Suid-Afrika uitgelewer moet word.

‘n Woordvoerder vir die liga, Troy Martens, sê hulle wil hierdeur 'n sterk boodskap stuur dat Suid-Afrika nie 'n plek is om moorde te pleeg en daarmee weg te kom nie.

Dewani word daarvan verdink dat hy die moord op sy vrou, Anni, beplan het.

'n Britse magistraat het Dinsdag Dewani se uitleweringsverhoor tot Julie aanstaande jaar uitgestel.

Die hof het gehoor dat die verdagte aan erge post-traumatiese stres ly en dat hy terugflitse ervaar van die aand waarop sy vrou vermoor is.

Die vonnisoplegging van die man wat daaraan skuldig bevind is dat hy die bruid op 13 November 2010 tydens haar wittebrood doodgeskiet het, se vonnisoplegging duur binnekort voort.

Xolile Mngeni sal weer in Kaapstad se hooggeregshof verskyn om sy lot aan te hoor.

Volg Nuus24 op Twitter 

- SAPA