Vroue wil nie Zuma-kinders onderhou
2010-02-18 08:40
Alicestine October
Kaapstad - Belastingbetalers betaal vir pres. Jacob Zuma se kinders, maar óns kinders ly honger.
Dít was van die uitlatings Woensdag voor die parlement toe lede van vroue-organisasies opgeruk het om hul stemme dik te maak teen onder meer hoë kospryse en geweld teen vroue en kinders.
Terwyl daar buite voete gestamp is, het parlementariërs binne die parlement na die begrotingsrede geluister.
Die organisasies dring ook aan op beter prosesse waardeur groter deelname van arm vroue en kinders aan die begrotingsproses beding kan word.
Daar is ook ’n beroep gedoen om strenger finansiële beheer oor uitgawes en vrou-sensitiewe begrotings.
Luidens die memorandum moet begrotingsprioriteite die behoeftes van die armes en gemarginaliseerdes in die samelewing in ag neem.
“Ek kyk so na die konvooie Mercedesse en dan dink ek by myself daar gaan ’n kliniek,” het Tumelo Kgosimmele van die Gender Advocacy-groep gesê.
Sweetgirl Vanqa, ’n ma van vier van Mfuleni, het kommer uitgespreek omdat nie-regeringsorganisasies, soos die tuisversorgers, nou minder geld kry.
Vanqa is werkloos en doen vrywillige tuisversorging van siek mense.
Sy word die afgelope drie jaar nie daarvoor betaal nie.
“Ek is nie tevrede met dié regering nie. Ons het almal vir Zuma gestem.
“Hy moet na ons kyk. Hy moet onthou die leer waarop hy staan kan maklik val.”
Fatima Shabodien, direkteur van die Women on Farms-projek, het gesê daar word al meer as 15 jaar gewag vir ’n beleid oor vroue wat gefinaliseer moet word.
“En elke keer weerspieël die begroting nie dit wat oor vroue gesê word nie.”
- Die Burger