Vroue tronk toe oor vliegkaartjie-sameswering
2011-07-20 21:17
Johannesburg – Twee vroue is Woensdag drie jaar tronkstraf elk opgelê nadat hulle saamgesweer het om debiet- en kredietkaarte te kloon en op bedrieglike wyse vliegkaartjies aan te koop.
Naomi Nhira (30) en Nomsa Hcube (24) het in die Spesiale Hof vir Kommersiële misdade in Bellville voor landdros Amrith Chabilall verskyn.
Die vroue – albei Zimbabwiërs – het vir ‘n kruideniersware-winkel in Kampsbaai gewerk toe die misdaad gepleeg is.
Hulle is skuldig bevind op 67 aanklagte van bedrog. Die polisie kon nie vasstel wat van die vliegkaartjies geword het nie.
Die lugrederye by wie die kaartjies gekoop is, is 1 Time Airways, Kulula, British Airways en SAA.
Die sameswering het aan die lig gekom toe kliënte van die winkel gekla het oor onwettige transaksies op hul krediet- of debietkaarte.
Die eienaar van die winkel het Hcube, die kassier, toe begin monitor. Hy het opgemerk dat elke keer wanneer ‘n kliënt met ‘n debiet- of kredietkaart betaal het, sy die nommer op ‘n stukkie papier sou neerskryf en dit dan aan Nhira, in die bakkery, sou aangee.
‘n Nigeriese man, Asagie Stanley Amomagiowani (33), het saam met die vroue verskyn. Hy het ook tereg gestaan op aanklagte wat met sameswering en bedrog verband hou, maar is vrygespreek. Hy is wel daaraan skuldig bevind dat hy die immigrasiewet oortree het. Hy is ‘n boete van R10 000 of drie maande tronkstraf opgelê.
Chabilall het beveel dat die twee vroue vir twee en ‘n half jaar in huisarres vrygelaat word nadat hulle ses maande van hul tronkstraf uitgedien het.
- Volg Nuus24 op Twitter
- SAPA