Vroue se vals eisplan van miljoene gefnuik
2011-11-06 11:06
Kaapstad – Twee Overbergse vroue se plan dat die een dood sou speel sodat ’n lewenspolis van R3 miljoen aan die ander een uitbetaal kon word, het lelik skeefgeloop toe die “dooie” verlede week vasgetrek is.
Die “dooie” Hanelie Nel (48) van Somerset-Wes het die afgelope Maandag op aanklag van polisbedrog in die landdroshof in Kaapstad verskyn.
’n Lasbrief is uitgereik vir die inhegtenisneming van haar eertydse lewensmaat, Doretha Kotze (57). Hul verhouding het glo kort ná die beweerde misdaad op die rotse beland.
Die plan was glo dat Nel dood sou speel sodat die versekeraar Liberty-Lewens ’n lewenspolis van R3 miljoen aan Kotze, die begunstigde, sou uitbetaal.
Maar bedrog is vermoed toe die eisvorms verwerk is, sê ’n woordvoerder van Liberty-Lewens. Die polisie se bedrogeenheid is toe ontbied.
Charlene van Graan (36), wat by die begrafnisondernemer Avbob in Caledon gewerk het, het saam met Nel in die hof verskyn en is op borgtog van R3 000 vrygelaat. Sy het na bewering gehelp om Nel se “doodsertifikaat” (met die belofte van ’n ruim “vergoeding”) te vervals.
Kotze en Nel het vroeër ’n bakkery op dié dorp bedryf. En nou gons dit in Caledon oor die vroue se “swak” papierwerk wat hul kans op kitsrykdom verydel het.
Dié sertifikaat, wat glo in die Paarl uitgereik is, wemel van ongerymdhede. Op die sertifikaat word aangedui dat Nel in Bloemfontein gesterf het en in Worcester veras is. Maar die krematorium in dié dorp het geen rekord van Nel se “verassing” nie.
Intussen is ook vasgestel dat die dokter wat kwansuis die doodsertifikaat onderteken het ten tyde van die “sterfgeval” oorsee was.
Maar as die doodsertifikaat ’n swak draaiboek is, lyk die verhaal van Nel se “afsterwe” na ’n makabere “lyk-” tog oor die hele land heen. ’n Werker wat die “lyk” in Hermanus gaan haal het en liefs naamloos wil bly, sê nou dat Nel op pad na die hospitaal aan ’n “hartaanval” dood is.
Maar hy kon Nel ongelukkig nie beskryf nie omdat die “oorledene” glo ’n “lappie” oor die gesig gehad het. En toe het “onbekende” mense glo die lyk laat haal en na Bloemfontein geneem.
Rapport het Kotze in Bultfontein in die Vrystaat opgespoor, maar sy het bloot gesê dis vir haar ’n baie moeilike situasie en haar prokureur sal verder praat. Koot Oosthuizen, Kotze se prokureur, het by navraag gesê sy kliënt gaan nie kommentaar lewer nie.
Kapt. Frederick van Wyk, ’n polisiewoordvoerder, sê nog ’n klag ingevolge die geboorte- en sterfteregistrasie- en versekeringswetgewing is by die klagstaat gevoeg.
Nel gaan Dinsdag om borgtog aansoek doen. Die saak kom weer op 7 Desember voor.
- Rapport