Vrou, vyf kinders sterf in botsing
2011-05-23 16:40
Noordwes – Ses mense, insluitend vyf kinders, is dood nadat 'n motor teen 'n vragmotor naby Boons in die Noordwes gebots het, het beamptes Maandag gesê.
"Daar word beweer dat 'n Ford Fiesta met sewe insittendes wat vanaf Johannesburg na Zeerust onderweg was, in die baan vir aankomende verkeer beland en teen 'n vragmotor gebots het," het die provinsiale departement van openbare veiligheid in 'n verklaring gesê.
Die ongeluk het omstreeks 02:00 op die Derby/Boons-pad plaasgevind.
'n Vroulike passasier in haar 50's, drie kinders, 8, 11, 13 en 'n tweeling van drie maande, is op die toneel dood.
Die 43-jarige bestuurder van die Ford Fiesta is na die Koster Provinsiale Hospitaal gehaas.
Die bestuurder van die vragmotor is nie beseer nie.
Volg Nuus24 op Twitter
- SAPA