Vrou vertel van stoeiery met 'Sondagverkragter'
2012-07-31 12:15
Johannesburg – ‘n Twintigjarige vrou het Dinsdag aan die hooggeregshofsitting in die Palm Ridge-landdroshof vertel hoe sy amper deur die vermeende Sondagverkragter ontvoer is.
“Hy het uit [‘n bakkie] geklim met ‘n rewolwer en my aan my regterarm gegryp,” het sy aan die hof gesê.
Die hof het beveel dat sy nie geïdentifiseer word nie, maar sy het nie in camera getuig soos die vorige minderjarige getuies getuig het nie.
Die vrou het getuig tydens die verhoor van Johannes Jacobus Steyn, wat as die Sondagverkragter bekendstaan.
Steyn word van die moord op Louise de Waal en Lazanne Farmer aangekla.
Steyn (36) staan ook tereg op 11 aanklagte van verkragting, 10 van seksuele aanranding, 10 van ontvoering, een aanklag van poging tot seksuele aanranding, een van poging tot ontvoering en twee aanklagte van aanranding.
Hy het ‘n week gelede onskuldig gepleit op die 37 aanklagte teen hom.
Die 11 meisies wat Steyn glo tussen 2008 en 2011 aangeval het, was tussen 11 en 18 jaar oud.
Die vrou wat Dinsdag getuig het, was 18 jaar oud ten tyde van die aanval en het aan die hof gesê sy het in Augustus 2010 saam met haar 11-jarige broer na ‘n kafee in Potchefstroom gestap toe ‘n bakkie langs hulle stilgehou het.
“Hy het vir my gesê, ‘Jy gaan saam met my kom.’”
Sy het met haar aanvaller baklei en met hom op die gras gestoei.
“My broer het net langs my gestaan. Hy het nie geweet wat om te doen nie,” het sy gesê en begin huil.
Regter Sita Kolbe het aan haar gesê sy sal beter voel as sy aan die hof vertel wat gebeur het.
Sy het geglimlag en aan die hof gesê sy het haar broer beveel om hul pa te gaan roep. Die aanval het twee huise van hulle s’n af plaasgevind.
“Ek het hom [die aanvaller] geskop en die deur toegemaak en huis toe gehardloop.”
Met haar aankoms by die hek van hul huis het haar pa agter die man aangehardloop, maar kon hom nie vind nie.
Haar broer het ook getuig oor die dag se gebeure en het sy suster se getuienis kalm bevestig.
– Volg Nuus24 op Twiter
- SAPA
