Vrou vermoor omdat sy lesbies is
2012-11-12 18:01
Johannesburg – 'n 19-jarige vrou van Kaapstad se Samora Machel- informele nedersetting is weens haar seksuele oriëntasie vermoor.
Adj.off. November Filander sê die polisie soek na vier mans wat vier vroue na bewering Vrydagaand aangeval het.
“’n Rusie het tussen die groepe ontstaan; een van die vroue is doodgesteek en nog een is gewond,” het Filander gesê.
Luleki Sizwe, ‘n organisasie wat hom beywer vir die regte van lesbiese en biseksuele mense, het intussen beweer Sihle Sikoji, die slagoffer, is weens haar seksuele oriëntasie vermoor.
“Dit is ‘n haatmisdaad. Die mans het aan hulle gesê hulle gedra hulle soos seuns. Toe Sihle sê dat hulle nie seuns is nie, maar lesbiërs, is hulle aangeval,” het Ndumie Funda, stigter van die organisasie, gesê.
“Voorvalle soos hierdie vind té gereeld plaas in informele nedersettings. Ons is diep seergemaak en terneergedruk oor haar dood. Sy was ‘n lewendige jong vrou.”
Filander het bevestig dat die ondersoek voortduur en dat niemand tot dusver in hegtenis geneem is nie.
– Volg Nuus24 op Twitter
- SAPA
