Vrou verloor lus om te leef ná plaasmoord
2011-02-27 07:05
Johannesburg - Sy sal nooit kan terugkeer plaas toe nie, sê Gail von Brandis.
Van haar en haar man se plaasopstal buite Groot Marico is net ’n bouval oor.
Von Brandis woon nou “agter slot en grendel” op die dorp.
Sy huil opnuut by die onthou van die nag ’n jaar gelede toe sy en haar man, Ben, aangeval is.
Gesmelte plastiek is oor haar bene gedrup. Sy is herhaaldelik gewurg.
“Ek dink hulle wou my bang maak,” onthou sy.
Sy moes kyk hoe haar man met ’n byl op sy kop, in sy gesig en oor sy bene gekap word voordat hy vir dood agter gelaat is.
Hy het oorleef, maar sal nooit volkome van sy beserings herstel nie. Die Von Brandisse is net terug plaas toe om hul besittings te pak.
Retha du Plessis se broers, Kobus en Piet Potgieter, is albei op die familieplaas vermoor.
Kobus is in 1995 vermoor en Piet in 2001.
Verdagtes is aangekeer en aangekla, maar in albei sake het die vermeende moordenaars skotvry uit die hof gestap.
Sy glo haar twee broers se dood het ook hul bejaarde, siek pa se dood verhaas.
“Kobus se vrou en sy kinders het weggetrek. Dit is nog ’n deel van ’n mens se familie wat weg is.”
Sy sê ’n mens verloor jou lus om te lewe ná sulke sinnelose moorde.
“Ek het opgehou tob daaroor. ’n Mens sal in ’n gestig beland as jy heeltyd wonder.”
Sy koester nie haat nie. “As ek die moordenaars vandag moet raakloop, sal ek net omdraai. Ek het niks vir hulle te sê nie.”
Haar kinders en die kinders van haar vermoorde broers is egter baie opstandig.
Du Plessis en haar gesin woon steeds op die familieplaas waar haar broers dood is.
“Waarheen sal ons gaan? Die Here hou sy hand oor ons,” sê sy gelate.
- Rapport