Vrou vas nadat sy 4 kinders alleen tuis los
2011-08-22 08:04
Pretoria – ’n Vrou (29) is deur die polisie in hegtenis geneem nadat sy na bewering haar vier kinders, onder wie ’n maand oue baba, twee dae lank sonder kos in haar huis toegesluit het.
Dié vrou van Nellmapius in Pretoria is die naweek op ’n klag van kinderverwaarlosing gearresteer.
Drie van die kinders – onderskeidelik twee, vyf en tien jaar oud – het glo gebewe van die koue toe die polisie by dié huis opgedaag het.
Die baba het geslaap en is vir ’n mediese ondersoek na ’n hospitaal geneem.
Kapt. Jan Sepato, ’n polisiewoordvoerder, het gister gesê die bure van dié vrou het met die polisie in verbinding getree nadat hulle die kinders onophoudelik vanuit die huis hoor skreeu en huil het.
“By die polisie se aankoms was die kinders aan die bewe en baie honger, want daar was niks in die huis om te eet nie,” het Sepato gesê.
“Ons het vasgestel die vrou het die kinders in die huis toegesluit omdat sy twee dae lank by ’n mansvriend van haar gaan kuier het.”
Dié vrou het glo nog twee ander kinders, maar dié kinders se pa’s het hulle vroeër reeds van hul ma af weggevat.
“Die maand oue baba word tans nog in die hospitaal behandel en die ander drie kinders is na plekke van veiligheid geneem,” het Sepato gesê.
Hy het gesê dié vrou sal in aanhouding bly totdat sy op 26 Augustus weer in die hof verskyn.
– Volg Nuus24 op Twitter
- Beeld