Vrou vas ná sy glo baba ontvoer
2010-02-25 05:20
Kaapstad - ‘n Vrou is Woensdag in hegtenis geneem nadat sy glo ‘n pasgebore baba in Worcester in die Wes-Kaap ontvoer het, het polisie gesê.
Kapt. Mzikayise Moloi sê die baba dogtertjie is Maandagnag, kort ná haar geboorte in die Worcester-hospitaal, ontvoer.
"Polisie het inligting aangaande ‘n verdagte vrou wat in Caledon met ‘n pasgebore baba gesien is, ontvang. Dié inligting het hulle na ‘n huis in Uitsig gelei, waar hulle die baba gevind het," het Moloi gesê.
Die vrou (34) is in hegtenis geneem en die baba is met haar ouers herenig.
“Sy het geen redes vir die ontvoering gegee nie en sal binnekort in die hof verskyn,” het Moloi gesê.
- Sapa