Vrou van vermiste boer steeds hoopvol
2011-10-11 16:46
Johannesburg – Die lugsoektog na 'n boer wat verlede maand in die Chobe-natuurreservaat in Botswana vermis geraak het, is afgelas, maar sy vrou hoop steeds dat hy gevind gaan word, het The Star Dinsdag berig.
"Ek leef steeds in hoop omdat hulle nog nie 'n enkele ding van hom gekry het nie – nie die botteldoppie van die water of sy horlosie nie." het Lorraine Bullen gesê terwyl die polisie en natuurkenners die soektog na die 80-jarige John Bullen voortsit.
Op 13 September het hulle na die Chobe-natuurreservaat gegaan waar hulle die aand in die Savuti-kamp sou oornag. Op pad na dié kamp het hulle besluit om na ’n ander kamp te gaan waar hulle jare gelede oorgeslaap het. Toe hulle daar kom, was die kamp egter gesluit. Plaaslike mense het die egpaar aangeraai om ’n kortpad tot by die volgende kamp te volg, het Beeld vroeër berig.
"Ons het aanhou ry en die pad het slegter geraak. Ons het nog 'n groep mans langs die pad gekry en hulle het gesê ons moet reguit aanry met die pad," het mev. Bullen gesê.
Die egpaar se Landrover het toe in die sand van ’n droë rivierbedding vasgeval en mnr. Bullen het op 14 September gaan hulp soek.
Hy het 'n byl, kompas, vyf liter water, twee blikkies vrugte en Provita-beskuitjies saamgeneem, maar is nooit weer gesien nie.
Mev. Bullen het op water en Provita-beskuitjies geleef voor 'n groep toeriste, wat ook verdwaal het, haar gevind en na 'n militêre basis geneem het vir hulp. Die toeriste het ook die voertuig uit die sand getrek.
Sy het aan The Star gesê die laaste dag toe sy gestrand was, het sy gebid.
"Dit het donker geraak toe sê ek vir die Here: 'As jy my gaan red, red my nou, maar as ek moet gaan, neem my nou.
"Die volgende ding wat ek gesien het is twee Nissan-dubbelkajuit-bakkies en toe begin ek huil."
Mev. Bullen het gesê haar man het "baie goeie stamina vir 'n man van sy ouderdom," maar sy is bekommerd dat hy nie lank in die bos sal kan oorleef nie.
– Volg Nuus24 op Twitter
- SAPA