Vrou van Weskus sterf tragies
2010-08-17 08:17
Die Burger
Kaapstad - ’n Kampeer-safari van twee Weskussers het in ’n tragedie geëindig toe ’n donkieketel by hul kamp in Botswana ontplof het.
Maretha Schroeder (58) van Paternoster is op slag dood toe sy teen die kop getref is deur vermoedelik ’n baksteen of ’n stuk van die ontploffende warmwatertenk.
Haar vriend, Niel van Zyl (58), ook van Paternoster, is met ernstige kopbeserings in die hoë-sorgeenheid van die Netcare Milpark-hospitaal in Johannesburg opgeneem.
Familielede het Maandagaand nog probeer vasstel wat presies gebeur het, terwyl owerhede in Botswana gesukkel het om die oorledene en beseerde se familie in Suid-Afrika op te spoor.
Die ontploffing het verlede Donderdag omstreeks 17:00 by ’n kampeerplek naby Mankwe, blykbaar bekend as die Khwai-kamp, plaasgevind, het asst.supt. W. Pule van die polisie in Maun gesê.
“Ons weet nie presies wat gebeur het nie. Dit was ’n fratsongeluk. Toe ons daar aankom, was die vrou dood en die man was al onderweg na die hospitaal.
“’n Baksteen of ’n stuk van die tenk het haar teen die kop getref. Iets het die man ook teen die kop getref. Niemand anders is beseer nie.”
Volgens Pule probeer die polisie nog ’n familielid kry wat Schroeder kan eien voordat haar oorskot na Suid-Afrika gebring kan word.
Personeel van die betrokke kampeerplek, asook ander kampeerplekke daar naby, wou Maandag nie oor die voorval praat nie.
Ren Mbulawwa, bestuurder van een van die kampe, het gesê hy weet van die voorval, “maar ons kan niks sê voordat die polisie nie hier was nie”.
Die ondersoekbeampte, ene David, was nie vir kommentaar beskikbaar nie.
Personeel van die Suid-Afrikaanse hoëkommissariaat in Botswana het gesê hulle kan niks sê voordat hulle met die oorledene se familie in verbinding was nie.
Gevra hoe Van Zyl in Johannesburg gekom het, het Pule gesê hy is per vliegtuig soontoe gebring.
Woordvoerders van die hospitaal wou Maandagmiddag niks sê nie.
Volg Nuus24 op Twitter
- Die Burger