Vrou van Kroonstad skuldig aan bedrog
2010-06-10 10:01
Volksblad
Kroonstad – ’n Voormalige werknemer van die landbou-onderneming Senwes op Kroonstad is in die streekhof hier op 70 aanklagte van bedrog skuldig bevind.
Streekhoflanddros Rudi Smit het een ander aanklag teen Selma du Plessis (48) teruggetrek.
Ná onderhandelings het die staat ingestem om dié aanklag terug te trek omdat die inligting nie korrek is nie.
Du Plessis het daarna in ’n omvattende pleitverduideliking skuld op die 70 aanklagte beken.
Du Plessis, wat op 6 November verlede jaar in hegtenis geneem is, het bedrog van altesaam R171 204,30 tussen 11 Maart 2008 en 7 Augustus verlede jaar met weegbrugfakture gepleeg.
Luidens die klagstaat het sy 16 transaksies van graanverkope nie opgeteken nie en die geld daarvan vir haarself gevat.
Voorts is 53 transaksies gedeeltelik opgeteken, waarvan sy die balans in haar eie sak gesteek het.
Du Plessis het reeds R110 000 terugbetaal. Sy is voornemens om die res voor haar vonnisoplegging op 19 Augustus terug te betaal.
Die vonnisoplegging is tot dan uitgestel sodat ’n deskundige ’n voorvonnisverslag kan opstel wat vir die hof van hulp kan wees.
Sy het in ’n stadium tydens haar verhoor psigiatriese behandeling ontvang.
Johann Wiegand kla aan.
Hannes Peyper van Welkom tree vir Du Plessis op.
Volg Nuus24 op Twitter
- Volksblad