Vrou sterf toe tandemswaai skeefloop
2009-10-05 06:31
Buks Viljoen en Aletta Otto
“Liefie! Liefie! Liefie!”
Só het ’n ernstig beseerde kaptein in die weermag eergister desperaat na sy vrou geroep en tussendeur mond-tot-mond-asemhaling op haar toegepas nadat ’n kabelswaaisprong buite Graskop, Mpumalanga, skeefgeloop het.
Kapt. Hendrik Samuels (28) en sy vrou, Jo-Ann (25), was saam in ’n harnas vasgegespe vir ’n tandemsprong en het sowat 60 m diep in die Panoramakloof gehang nadat hulle hul teen ’n rots te pletter geval het.
Samuels, verbonde aan 7 Suid-Afrikaanse Infanteriebataljon (7SAI) in Phalaborwa, se pogings om sy vrou se lewe te red, was vergeefs.
“Wat aanvanklik gille van opgewondenheid was, het in ’n bloedstollende gil van angs ontaard toe hulle besef hulle is besig om te val,” het ’n geskokte vrou, wat nie haar naam bekend wou maak nie, kort ná die voorval aan Beeld gesê.
Me. Samuels, tot onlangs toe nog ’n onderwyser by die Hoërskool Wesvalia in Klerksdorp, is skynbaar op slag dood.
Die ongeluk het ten aanskoue van talle toeriste, onder wie Frans Effrink van Modimolle (Nylstroom), gebeur.
Effrink het aan die oorkant van die kloof gestaan.
Hy het, onbewus van die noodlottige drama wat hom sou afspeel, ’n video van die Samuels-egpaar se sprong geneem. “Hulle het oor die kloof geswaai. Sekondes nadat hulle begin terugswaai het, het ek ’n klapgeluid gehoor.
“Ek het opgekyk en gesien hoe die katrol wat aan die dik kabel wat oor die kloof gespan is, begin skuif. Die swaaitou het outomaties langer geraak. Die volgende oomblik het die paartjie die rots onder-in die vallei getref. Vir etlike minute was daar doodse stilte terwyl die twee skaars ’n meter bokant die vloer van die vallei gehang het.”
Effrink het gesien hoe kapt. Samuels begin beweeg. “Dis so ’n magtelose gevoel om te hoor hoe desperaat hy om hulp skreeu. Nie een van ons kan iets doen nie.”
Effrink kon sien hoe Samuels mond-tot-mond-asemhaling op sy vrou doen.
Luke Martin, hoof van die provinsiale ambulansdiens in Nelspruit, was lid van die span van die Rooi Kruis se Air Mercy Services (AMS) wat aan die reddingspoging deelgeneem het.
Volgens hom het me. Samuels veelvuldige beserings opgedoen en sy was reeds dood toe hulle haar bereik.
“As gevolg van die steil kranse was dit ’n baie moeilike reddingspoging.”
Die reddingspoging het sowat vyf uur geduur.
Omdat die helikopter nie in die diep kloof kon afsak nie, moes die reddingspan, onder wie insp. Danie Theron van die polisie se reddingseenheid in Witrivier, die draagbare met die Samuels-egpaar daarop teen die steil krans uitsleep.
Kapt. Samuels is met die AMS-helikopter opgepik en na die Nelspruitse Medi-Clinic gehaas. “Hy is in ’n stabiele toestand, maar in hierdie stadium uiters emosioneel,” het Robyn Baard, woordvoerder van die hospitaal, gister gesê.
Volgens konst. Kethimoze Nkosi van die polisie in Graskop vermoed hulle een van die katrolle of ’n rat wat die tou voer, het waarskynlik gebreek.
Hy het gesê ’n klag van strafbare manslag word ondersoek.
Mike van der Merwe, eienaar van Big Swing wat die swaai bedryf, het gister ontken hul toerusting was foutief.
“Daar was nie fout met ons stelsel nie. Ons het dit getoets.
“Ons wag nou nog vir die uitslag van die ondersoek,” het hy bygevoeg.
- Beeld