Vrou sterf ná bus teen huis bots

2012-12-08 12:38

'n Vrou is dood en verskeie ander beseer nadat dié bus in 'n huis geploeg het. (Foto: ER24)

Johannesburg – 'n Vrou is dood en 19 ander mense, waaronder 18 skoolkinders, is beseer nadat 'n skoolbus teen 'n huis in Krugersdorp gebots het, het paramedici in Gauteng gesê.

Santi Steinmann, woordvoerder van Netcare, het gesê die bestuurder het beheer oor die voertuig verloor.

Drie vroue het op die gras langs die huis gesit en die bus het hulle getref, het ER24 gesê. Een van die vroue is vermoedelik onder die bus gesleep en het weens haar beserings gesterf. Albei die ander vrou se bene is gebreek en die derde vrou het sonder beserings ontsnap.

"'n Vrou is dood in die ongeluk en nog 'n persoon het kritieke beserings opgedoen en is na 'n nabygeleë hospitaal geneem," het Steinmann gesê.

"Die res van die beseerdes het geringe tot ernstige beserings opgedoen en is per ambulans na hospitale in die gebied geneem vir verdere behandeling."

Steinmann het gesê brandbestryders het reddingskake gebruik om die beseerde bestuurder van die bus te bevry.

Niemand was ten tyde van die voorval tuis nie.
      
– Volg Nuus24 op Twitter

- SAPA