Vrou sterf in ongeluk
2010-01-23 09:40
Jana Engelbrecht
Kimberley – ’n Jong ma van Barkly-Wes is hier dood toe sy beheer oor haar bakkie verloor, die bakkie gerol en teen ’n draadheining tot stilstand gekom het.
Die bakkie se band het vermoedelik gebars.
Lientjie Nel (21) is Donderdag dood toe sy omstreeks 16:30 in ’n ongeluk op die N12-hoofpad tussen Kimberley en Modderrivier was.
Supt. Sam Sesing, polisiewoordvoerder, het gesê sy is op die toneel dood.
“Haar veiligheidsgordel was vasgemaak en nooddienswerkers moes dit losmaak om haar uit die wrak te bevry.
“Die Isuzu-bakkie waarmee sy gery het, het aan die linkerkant van die pad afgery, toe weer regoor die pad gery na die regterkant van die pad, begin rol en teen die draad voor die treinspoor tot stilstand gekom,” het hy gesê.
Judy Hattingh, ma van Nel, het gesê sy was op pad van Hopetown toe sy in die ongeluk was.
Nel was ’n areabestuurder van Mega Furniture en het ’n tak van dié maatskappy op Hopetown gaan besoek. “Sy het een keer ’n maand soontoe gery, maar het op Barkly-Wes gewerk.”
Hattingh het gesê Nel was ’n borrelende mens. “Sy was die beste kind waarvoor ’n mens kon vra. Sy het altyd almal se probleme opgelos en planne gemaak.”
Nel se man, Pierre (25), het gesê hy sal nou moet sterk wees ter wille van hul 3-jarige dogtertjie, Kaylle.
“Ek sal haar volgens haar ma se beginsels grootmaak. Ek was baie lief vir Lientjie. Sy was my rots en my maat.”
Nel se begrafnis is Dinsdag om 12:00 uit die AP kerk op Barkly-Wes.
Sy word oorleef deur haar man, haar ma, haar pa, mnr. Marco Hattingh, haar broer, Jumar, en sy vrou, Marize.
- Volksblad