Vrou sterf enkele minute ná bysteek
2011-05-04 07:05
Bethuli - ’n Bekende vrou van die dorp is enkele minute nádat ’n by haar in ’n aar in die nek gesteek het, dood.
Maryna Rudman (52) het Sondag laatmiddag saam met haar man, Tim Rudman, aan die etenstafel gesit toe ’n by haar gesteek het. Sy was baie allergies vir bysteke en is minute later dood.
Suzanne le Roux, haar skoonsuster, sê die dood is ’n geweldige skok vir die familie.
“Soos wat ons verneem het, het Maryna aan die etenstafel gesit toe sy in haar nek gesteek is. Sy het ’n hewige reaksie van die bysteek gekry en is vinnig daarna dood.”
Le Roux sê omdat Rudman so allergies vir bye was, is medisyne en inspuitings onmiddellik vir haar gegee, maar dit was te laat.
Rudman en haar man het ’n jagplaas, Oude Fontein, bedryf.
“My skoonsus is hier gebore en het hier grootgeword. Sy was baie geesdriftig oor die lewe en haar hele hart en siel was in die jagplaas. Sy was ’n mens wat altyd hard gewerk het om ’n sukses van enigiets te maak.”
Die begrafnisdiens is môre om 11:00 in die NG kerk op die dorp. Dr. Gerdrie van der Merwe sal die diens behartig.
Benewens haar man word Rudman oorleef deur vier kinders en haar ma, Ansa Lemue van Bethulie.
- Volksblad
