Vrou steel glo kind by skuiling
2011-06-03 15:45
Johannesburg – 'n Eenjarige kind is deur 'n onbekende vrou by 'n skuiling vir verwaarloosde kinders in Johannesburg gesteel.
Sekuriteit by The Door of Hope-skuiling is intussen verskerp en die skuiling het 'n beroep op inwoners gedoen om te help om die kind op te spoor.
Die verdagte wat vermoedelik die babameisie gevat het, het Dinsdag na die skuiling gekom en gesê haar suster wil haar kind opgee en dat sy na die skuiling gestuur is om die toestand van die plek te kyk.
Die vrou het Donderdag teruggekeer met 'n kombers en vermoedelik 'n baba in een van die kamers gevat, in die kombers toegedraai en die pad gevat.
Cheryl Allen van The Door of Hope sê sy vermoed die vrou het die baba geken.
"Dit was nie die kind naaste aan die deur nie, ook nie die kleinste nie. Dit was 'n spesifieke baba."
Jenny Moodley, polisiewoordvoerder, het gesê 'n saak van kinderdiefstal word ondersoek.
Lees meer hier
Volg Nuus24 op Twitter