Vrou, seuns ná plaasmoord vasgetrek
2012-08-14 17:57
Johannesburg – ‘n Vrou en vier seuns wat van die moord op ‘n bejaarde boer verdink word, is ná ‘n skietery en jaagtog in Knysna in hegtenis geneem, het die Wes-Kaapse polisie gesê.
Kapt. Malcolm Pojie het in ‘n verklaring gesê die polisie het die vier seuns – tussen die ouderdomme van 12 en 17 – en ‘n 22-jarige vrou in ‘n Isuzu Frontier in die Plettenbergbaai-gebied in die rigting van Knysna vasgetrek.
‘n Provinsiale verkeersbeampte het die bakkie Maandagaand in Beacon Valley-weg gesien en besef dat die voertuig geen nommerplate gehad het nie.
“Hy het hulle begin jaag toe die verdagte voertuig in die rigting van Knysna weggejaag het,” het Pojie gesê.
Die insittendes het later op die verkeersbeampte begin skiet. Hy het later die Knysna-polisie en ‘n ander verkeersbeampte ontbied.
Pojie sê die bestuurder het naby Knysna beheer oor die voertuig verloor.
“Dit het gerol, by ‘n steil wal afgerol en in ‘n sloot beland,” het Pojie gesê.
Hy sê vier seuns en ‘n vrou was in die voertuig.
Die vrou en twee van die seuns het ernstige beserings opgedoen en is na ‘n hospitaal geneem. Die twee ander seuns is na die Knysna-polisiestasie geneem.
Die polisie vermoed ‘n sesde passasier het op die vlug geslaan.
Polisiebeamptes het ‘n geweer en vier jaggewere met ammunisie in die voertuig gevind, asook items soos kameras, verkykers, klere, drank en kontant.
Pojie sê die items en die voertuig het aan Owen Charles behoort.
Charles (70), ‘n boer van Jansenville, is onlangs op sy plaas vermoor. Sy vrou is kritiek beseer. Die aanval het Sondagaand tussen 19:00 en 22:00 op die plaas Armadale plaasgevind.
Volg Nuus24 op Twitter
- SAPA
