Eksvrou sal teen Modimolle-monster getuig
2012-11-19 06:55
Johannesburg – Die verhoor van vier mans wat daarvan beskuldig word dat hulle 'n vrou van Modimolle verkrag het, sal na verwagting Maandag in die Pretoriase hooggeregshof begin.
Johan Kotzé (50) word daarvan beskuldig dat hy drie mans gehuur het om sy vervreemde vrou, Ina Bonnette, te verkrag en dat hy haar seun vermoor het.
Intussen het Bonnette gesê sy het haarself geestelik voorberei en “is reg” om teen haar eksman, Kotzé, te getuig, berig Beeld.
Sy vrees egter die onbekendheid van die hof, waar sy moontlik al Maandag of Dinsdag teen die sogenaamde Modimolle-monster gaan getuig.
Kotzé het Andries Sithole, Peter Mohlako, en Sello Mphaka aangestel het om in die tuin van sy huurhuis in Modimolle te werk.
Hy het die mans na bewering met 'n vuurwapen gedreig en beveel om Bonnette met voorwerpe, insluitend spykers en 'n skroewedraaier, te martel.
Kotzé het na bewering ook sy stiefseun, Conrad, na die huis gelok en hom koelbloedig doodgeskiet.
Die mans staan tereg op sewe aanklagte en drie alternatiewe aanklagte, insluitend verkragting, moord, ontvoering, poging tot moord.
– Volg Nuus24 op Twitter
- SAPA
