Vrou op straat met byl gedood
2011-04-27 06:49
Welkom. – ’n Verpleegsuster is Dinsdag in die middel van ’n straat deur haar eks-kêrel met ’n splinternuwe byl doodgekap nadat hy teen haar motor vasgejaag het om haar te laat stilhou.
Emily Mojabeng Tabo (36) het al ’n beskermingsbevel teen die man gehad voordat hy haar Dinsdag ná die botsing oorval het toe sy probeer vlug. Hy het haar na die motor teruggesleep en talle kere met die byl gekap. Sy is bykans onthoof.
Inwoners van Koppie Alleenweg voor wie se huise die moord plaasgevind het, het gesê hulle is omstreeks 05:45 gewek deur die bloedstollende gille van ’n vrou.
Sy het onder meer aanhou skreeu: “Help my, help my!”
Een van die inwoners wat anoniem wil bly, het gesê sy is na buite waar sy die erg verminkte vrou langs die middelman in die straat gekry het. Sy was reeds dood en haar moordenaar was weg.
Kapt. Stephen Thakeng, polisiewoordvoerder, het gesê Tabo en ’n kollega was op pad na die Bongani-hospitaal waar hulle werk toe die man van agter teen haar motor gebots het.
Sy het stilgehou en hy het haar uit die motor geruk.
Sy het probeer weghardloop, maar hy het haar oorval en talle kere met die byl gekap.
Thakeng het gesê sy is bykans onthoof, haar een vinger is afgekap en sy het talle kapwonde oor haar arms en hande gehad soos sy probeer keer het.
Die vriendin het om hulp geskreeu, maar toe niemand opdaag nie, het sy weggehardloop.
Die moordenaar, wie se motor in die botsing beskadig is, het in Tabo se groen Toyota Tazz weggejaag.
Die splinternuwe byl, met die prys steeds daaraan, is langs haar lyk gekry. Die moordenaar het enkele ure later naby Brandfort met die motor van die pad gery en in die modder vasgeval.
Hy het ’n insleepdiens gebel wat onraad vermoed en die polisie ontbied het.
Die twee vroue se handsakke is in die motor gekry. Die moordenaar is daar in hegtenis geneem.
Thakeng het gesê die 37-jarige man het pas uit die tronk gekom nadat hy ’n vonnis van vyf jaar uitgedien het weens poging tot moord nadat hy ’n vorige vriendin geskiet en gewond het.
Volg Nuus24 op Twitter.
- Beeld