Vrou ontvoer, besteel, verkrag
2009-09-26 03:45
Johannesburg – Twee mans is in hegtenis geneem op aanklagte daarvan dat hulle ‘n 27-jarige vrou ontvoer en verkrag het.
Volgens polisie is die vrou vroeg Vrydagoggend in Evaton ontvoer terwyl sy vir ‘n bus gewag het om werk toe te gaan.
"Terwyl sy vir die bus gewag het, het ‘n rooi voertuig verby die bushalte gery. Die voertuig het toe teruggekom en vier mans het uitgeklim en haar in die motor forseer”, het insp. Kinnie Steyn gesê.
Die mans was onbewus daarvan dat die vrou se ma vanuit haar huis gesit en wag het vir haar dogter om veilig op die bus te klim. Sy het gesien wat gebeur het en die polisie gekontak.
Die vrou se selfoon het geval terwyl die mans haar in die motor forseer het en dit het polisie gelei na ‘n OTM in Springs, waar die mans haar forseer het om geld te trek.
Die verdagtes het reeds die toneel verlaat toe polisie daar opgedaag het, maar die voertuig is later in Evaton raakgesien. Polisie het die vrou saam met een van die verdagtes in die voertuig gevind.
Dié verdagte is in hegtenis geneem en ‘n tweede man is later deur polisie gevang. Die twee ander verdagtes is nog op vrye voet.
Die vrou het aan polisie vertel dat sy verkrag is maar Steyn kon die bevestig hoeveel van die mans haar verkrag het nie.
- Sapa