Vrou keelaf gesny, 4 erg aangerand
2009-10-02 06:43
Aletta Otto
Middelburg (Mpumalanga). – Die polisie is intensief besig met ’n soektog na ’n man wat ’n vrou keelaf gesny en nog vier ander vroue aangerand het in die myndorpie Koornfontein.
Maria Sibeko (48) is dood nadat al die slagare in haar keel afgesny is in ’n 4cm lange sny wat van die linkerkant van haar nek tot bo haar regterbors strek.
Sy is vermoedelik met ’n broodmes vermoor.
Haar aanvaller het Evette van Rensburg (17) met vermoedelik dieselfde mes in die nek gesteek. Hy het Rika Pretorius (39) en haar dogter, Kimberley Pearce (15) asook Maria Terblanche (65), Preto-rius se ma, ook aangeval.
Pretorius is met ’n onbekende voorwerp tussen die nek en skouer in die rug gesteek.
Insp. Johan van Vuuren, ondersoekbeampte van die Blinkpan-polisiekantoor, het gesê die aanvaller is vermoedelik ’n Mosambiekse immigrant wat aan sy slagoffers as Nando bekend is. Hy het teëlwerk aan ’n buitekamer by Pretorius se huis gedoen en het al voorheen bouwerk by Evette se ouerhuis gedoen.
Pretorius en Terblanche was omstreeks 14:00 besig om koffie in die huis te drink. Nando het Pretorius glo kom roep om na iets in die buitekamer te kyk. Hy het haar na bewering op die vloer neergegooi en met sy knie vasgedruk. Hy het haar glo in die stoeiery wat gevolg het in die rug gesteek.
Terblanche het Pretorius te hulp gesnel toe sy die geskreeu hoor. Nando het haar glo aan die bors gegryp, maar gelos toe sy in die rigting van die huis se agterdeur gehardloop het na waar Kimberley gestaan het. Hy het glo daarna op Pretorius en Kimberley afgestorm.
“Kimberley het die man met die yskasdeur geslaan en hy het by die erf uitgehardloop,” het Van Vuuren gesê.
Nando is daarna na Evette se huis.
Evette het aan Beeld vertel sy is in haar slaapkamer vasgekeer.
Sy kon tot by haar deur kom waar die aanvaller haar met die broodmes in die nek gesteek het.
“Die mes het uitgetrek soos wat ek grond toe neergesak het. Hy het gevlug. Ek het my selfoon gegryp en by die voordeur uitgehardloop. Ek het heeltyd geskree: ‘Help my!’ terwyl ek my kêrel probeer bel het.”
Haar kêrel, Mark du Preez (21), het oomblikke later toevallig daar aangekom en met haar na die kliniek in Koornfontein gejaag.
Die aanvaller het intussen na die buitekamer gehardloop waar Sibeko gestaan en stryk het en haar vermoor.
Evette is eergisteraand geopereer. Sy behoort vandag uit die Life Health Cosmos-hospitaal in Witbank ontslaan te word.
“Ek ruik hom die heeltyd aan my. Dit is so ’n mengsel van dagga en drank,” het sy vertel.
Haar ouers, Steve en Corrie Smit, is erg geskok.
“My arme kind. En my huiswerker, hoekom het hy haar vermoor en so wreed? Sy werk al 25 jaar vir my. My hart is verskriklik seer,” het mev. Smit gesê.
- Beeld